Дэлхийн хүн амд тулгамдах болсон эрүүл мэндийн асуудлуудын нэгт таргалалт орж байна. Таргалалт нь ихэвчлэн хөдөлгөөний дутагдал, хоол хүнсний зохисгүй хэрэглээ буюу буруу хооллолтоос үүсч байна.
Хоол хүнсээ зохисгүй хэрэглэвэл ходоодны өвчин, ууц нурууны өвчин, зүрх судас болон хоол боловсруулах эрхтэн тогтолцоонд сөргөөр нөлөөлөх аюултай байдаг. Хүн бүрийн бие организм өөр учраас та өөрийнхөө зөв хооллолтын хэм хэмжээг зохицуулах дадалд суралцах нь зүйтэй.
Эрүүл хооллож байна гэж юу ч идэхгүй, хэтэрхий жингийн дутагдалтай байж, өөрийгөө зовоох хатуу дэглэм барь гэсэн үг огт биш юм. Харин өөрт тохирсон хоолоо өглөө, өдөр, орой гэсэн гурван цагуудад зөв хуваарилан хооллох дадал юм.
Өдөр тутмын амьдралдаа зөв хооллож сурвал таргалахгүйгээс гадна олон янзын өвчинөөс сэргийлж чадах юм. Зохистой хооллолтыг хэдхэн өдөрт хийдэггүй тул та тууштай, тэвчээртэй, хичээх хэрэгтэй болно. Ингэснээр таны эрүүл мэнд, ой ухаан сайжирч, эрч хүч нэмэгдэж, сэтгэл санаа тань тогтворжино.
